ბიძინა ივანიშვილი არ არის ის ადამიანი, ვინც გარკვეული თანხების სანაცვლოდ წავა და დაუპირისპირდება თავის სახელმწიფოს, თავისი ხალხის და ქვეყნის ინტერესებს - ნებისმიერი პოლიტიკური შეხედულების ადამიანს უნდა უნდოდეს, რომ სანქციებს არ დაექვემდებაროს იმ ადამიანის რესურსი, რომელიც თავის ქვეყანაზე ზრუნავს, თანაც უანგაროდ, - ამის შესახებ „ქართული ოცნების“ დეპუტატმა, გია ვოლსკიმ „ქართული ოცნების“ დამფუძნებლის, ბიძინა ივანიშვილის და შვეიცარიულ ბანკ „კრედიტ სუისის“ საქმესთან დაკავშირებით განაცხადა.
მისივე თქმით, „კრედიტ სუისის“ მხრიდან, ფინანსური რესურსის გამოყენებით, შანტაჟის და ზეწოლის ყველა ნიშანი სახეზეა, რაც სამწუხარო ფაქტია.
„მნიშვნელოვანია, რომ არც ბიძინა ივანიშვილი არის ის ადამიანი, ვინც გარკვეული თანხების სანაცვლოდ წავა და დაუპირისპირდება თავის სახელმწიფოს, თავისი ხალხის და ქვეყნის ინტერესებს, ასე რომ აი, ეს ჭიდილი გრძელდება, მაგრამ ჩვენ კიდევ ერთხელ უნდა გავიხსენოთ, თუ რამხელა საქველმოქმედო პროექტებია დღის წესრიგში. თუნდაც საგანმანათლებლო, ჯანმრთელობის დაცვის კუთხით და რასაკვირველია, ყველას უნდა უნდოდეს ნებისმიერი პოლიტიკური შეხედულების ადამიანს, რომ ეს გაგრძელდეს და სანქციებს არ დაექვემდებაროს იმ ადამიანის რესურსი, რომელიც თავისი ქვეყნისთვის ზრუნავს, თანაც უანგაროდ. ეს არის საერთო შეხედულება, რაც წესით ამ ქვეყანაში უნდა არსებობდეს, სამწუხაროდ, ეგეთი დამოკიდებულება არ არის“, - განაცხადა ვოლსკიმ.
შეგახსენებთ, იურიდიულმა ფირმამ, „ემ ქეი დიმ“ გაავრცელა სტატია, სადაც აღნიშნულია, რომ „კრედიტ სუისის" მენეჯმენტი დაუფარავად აშანტაჟებს ივანიშვილს და მიზანმიმართულად ანგრევს საკუთარი ბანკისა და შვეიცარიის საბანკო სისტემის იმიჯს. მათივე ცნობით, აღნიშნული სტატიის გამოქვეყნებაზე ევროპულ პრესაში მათ კვლავ უარი უთხრეს.