ელჩებთან საუბრისას იყო ხაზგასმა იმაზე, რომ მათ აქვთ წუხილები კანონის კონკრეტულ მუხლებთან, თუმცა გამჭვირვალობის წინააღმდეგი არ არიან, - ამის შესახებ საგარეო ურთიერთობათა კომიტეტის თავმჯდომარემ ნიკოლოზ სამხარაძემ პარლამენტის ორი კომიტეტის გაერთიანებულ სხდომაზე განაცხადა, სადაც ე.წ. უცხოური გავლენის აგენტების შესახებ საკანონმდებლო ინიციატივების განხილვა მიმდინარეობს.

სამხარაძის თქმით, გუშინდელ შეხვედრაზე, სადაც პარლამენტის თავმჯდომარე შალვა პაპუაშვილი ევროკავშირის ელჩს და ევროკავშირის წევრი ქვეყნების ელჩებს, „უცხოური გავლენის გამჭვირვალობისა“ და „უცხოელი აგენტების რეგისტრაციის აქტის თაობაზე“ კანონპროექტებთან დაკავშირებით, შეხვდა, ელჩების შეთავაზება იყო კანონი ისეთი ფორმით მიიღონ, რომ გამჭვირვალობას პრობლემა არ შეექმნას.

„ბევრი ტყუილი და არასწორი ინფორმაცია გაჟღერა, ამიტომ საჭიროა ჩვენმა საზოგადოებამ სიმართლე იცოდეს. პირველ რიგში, მინდა ვთქვა რომ იმ შეხვედრაზე, რომელიც გუშინ გაიმართა, მეც ვიმყოფებოდი. ასე რომ, მესამე და მეოთხე წყაროებიდან მოყოლილ ინფორმაციას ჯობია, მე მომისმინოთ და გეტყვით, რა მოხდა შეხვედრაზე.

შეხვედრაზე ჩვენ დეტალური განხილვა გვქონდა საჭიროებებისა, პრობლემებისა და გამოწვევებისა, რომლის წინაშეც საქართველო დგას და ეს არის სერიოზული პრობლემები. პრობლემები დაკავშირებულია გაუმჭვირვალობასთან, რომელიც იმ ფინანსებთან არის დაკავშირებული, რომელიც შეიძლება შემოდიოდეს მტრული სახელმწიფოებიდან. თქვენს მიერ, რატომ არის მაინც და მაინც აქცენტი გაკეთებული დასავლეთზე? საერთოდ არ ფიქრობთ იმაზე, რომ საქართველოში არსებობენ ორგანიზაციები, რომლებიც ფინანსდებიან მტრული სახელმწიფოების მიერ.

საქართველოში ასევე არსებობს ექსტრემისტული რელიგიური ორგანიზაციებისა, რომლებმაც საქართველოს უსაფრთხოებას, შეიძლება დიდი საფრთხე შეუქმნან. ესეც არის მნიშვნელოვანი საკითხი, რომელზეც ჩვენ გუშინ ელჩებთან ვისაუბრეთ.

ასევე ელჩებთან საუბრისას იყო ხაზგასმა იმაზე, რომ მათ აქვთ წუხილები კანონის კონკრეტულ მუხლებთან, თუმცა ისინიც გამჭვირვალობის წინააღმდეგი არ არიან, შესაბამისად გვთავაზობენ იმას, რომ ჩვენ ეს კანონი ისეთი ფორმით მივიღოთ, რომ გამჭვირვალობას არ შეექმნას პრობლემა, თუმცა ის წუხილები, რომლებიც არსებობს ჩვენ მოვაგვაროთ. ეს იყო ელჩებთან შეხვედრის შინაარსი“, - განაცხადა სამხარაძემ.