ყველას, ვისაც შეუძლია ფიზიკურად სიარული, მოდით პარლამენტთან, შეგიძლიათ ჩათვალოთ, რომ თქვენ ქვეყანას „ქართული ოცნება“ მორიგ ჯერზე აბარებს პუტინის რეჟიმს, - ამის შესახებ პარლამენტში ოპოზიციის მიერ გამართულ ბრიფინგზე სალომე სამადაშვილმა განაცხადა.

მან ასევე მოუწოდა „ნაციონალური მოძრაობის“ დეპუტატებს დაბრუნდნენ ბოიკოტიდან, რადგან „ბრძოლის ველი ევროპული მომავლის დასაცავად დღეს არის აქ“ და ყველამ უნდა შეასრულოს თავის ვალი ქვეყნის წინაშე.

მისივე თქმით, ამისთვის მათ სჭირდებათ „ქართველი ხალხისგან გამაგრებული ზურგი“.

„ჩვენი ქვეყანა დღეს არის რუსეთის საოკუპაციო რეჟიმის ქვეშ, ის ხალხი, ვინც უმრავლესობაში ზის ამ დარბაზში, არის რუსეთის საოკუპაციო რეჟიმის წარმომადგენელი. ისინი აქ ფარულად ცდილობენ კიდევ ერთი ნაბიჯი გადადგან ამ ქვეყნის რუსეთისთვის გადაფორმების პროცესში, ეს პროცესი დიდი ხანია მიდის და ახლა დაიწყო დაჩქარებულად. ამიტომ საქართველოს ყველა მოქალაქეს, ვისაც მიაჩნია, რომ საქართველო არ უნდა იყოს რუსეთის დაქვემდებარებაში მყოფი ტერიტორია, სახელმწიფოს ვერ შევინარჩუნებთ, ევროკავშირის გარეშე არ იარსებებს ქართული სახელმწიფო, ამიტომ მოგიწოდებთ მოდით პარლამენტის შენობასთან და უთხარით თქვენი სათქმელი ამ საოკუპაციო რეჟიმს, როგორც ერთხელ თქვენ უკვე უთხარით, როცა გაბედეს და გავრილოვი დასვეს პარლამენტის დარბაზში. დღეს უარესი რამ ხდება, ამ კანონის მიღებით იქმნება კედელი ჩვენს და ევროკავშირს შორის, როგორც ბერლინის კედელი იყო აღმართული და ყოფდა თავისუფალ სამყაროს დანარჩენისგან, ასეთ კედელს აშენებს რუსეთის საოკუპაციო რეჟიმი“, - განაცხადა სამადაშვილმა.