ჩვენ არ ვაპირებთ პროტესტის შეწყვეტას, როდესაც საქმე ჩვენს ევროპულ მომავალს ეხება, - ამის შესახებ „ლელოს“ ერთ-ერთმა წევრმა, საბა ბუაძემ პარლამენტთან მიმდინარე აქციაზე განაცხადა.

მისი თქმით, საზოგადოებრივ პროტესტს ვერაფერი შეაჩერებს.

„ამ რუსული არჩევანის დაცვაში დღეს ივანიშვილი არის მარტო მთლიან სახელმწიფო აპარატთან ერთად. სრულიად მშვიდობიანი მანიფესტაცია დაშალეს დღეს. მათი შეშინებული მდგომარეობის დამადასტურებელი იყო დღეს ის ყველაფერი, რაც გააკეთეს. ამ ყველაფერს ჩვენ ჩვენი ერთიანობა უნდა დავუპირისპიროთ იმიტომ, რომ ჩვენ არ გვაქვს ფუფუნება, უარი ვთქვათ ჩვენს მომავალზე. საქმე ეხება ჩვენს მომავალს. მეორე მხარეს არის ერთი ადამიანი, რომელიც ცდილობს, ეს მომავალი წაგვართვას. დარწმუნებული ვარ, ძალიან მაგარი პროტესტი კიდევ უფრო დიდ წინაარმდეგობრივ მოძრაობაში გადაიზრდება. ამ სამარცხვინო მეთოდებით ჩვენს გაჩერებას ვერ შეძლებენ”, - განაცხადა ბუაძემ.

გარდა ამისა, აქციაზე პარტია „დროას“ ლიდერმა, ელენე ხოშტარიამ განაცხადა, რომ ზურა ჯაფარიძის ადგილსამყოფელს ამ დრომდე ადგენენ.

„ზურა ჯაფარიძის ადგილსამყოფელის გაგებას ამ დრომდე ველოდებით. სრულიად სამარცხვინო არის „ოცნების“ სახალხო დამცველი, რომელიც დღემდე აქ არ დგას, არ დადის და არ პატრონობს დაკავებულ ხალხს, მის პოლიტიკურ პოზიციაზე აღარც მაქვს ლაპარაკი. ჩვენ თვითონ დავიცავთ ხალხს და გავაგრძელებთ ბრძოლას“, -განაცხადა ხოშტარიამ.

ცნობისთვის, შსს „გირჩი-მეტი თავისუფლებისთვის“ ლიდერი ზურაბ ჯაფარიძის დაკავებას ადასტურებს. როგორც უწყებაში აცხადებენ, ჯაფარიძე ადმინისტრაციული წესით, კერძოდ, სკ-ის 166/173 -ე მუხლებით არის დაკავებული.

ზურაბ ჯაფარიძე ამ დროისთვის პოლიციის განყოფილებაში იმყოფება.