„ერთიანი ნაციონალური მოძრაობის“ პოლიტსაბჭოს წევრის, ლაშა ფარულავას განცხადებით, თბილისის განვითარების ფონდის მიერ, პროექტის „ახალი თბილისის“ მსხვილი არეალების რეაბილიტაციის პროგრამის ფარგლებში, საიათნოვას ქუჩაზე, სამშენებლო ობიექტები უხარისხოდ, არაკეთილსინდისიერად და დარღვევებით განხორციელდა.

მისივე თქმით, კერძო მესაკუთრეებმა თბილისის განვითარების ფონდს, უხარისხოდ განხორციელებულ სამშენებლო სამუშაოებზე და ისტორიული მემკვიდრეობის ავთენტური ნაწილის დაზიანებაზე რეაგირება მოსთხოვეს.

„თბილისის განვითარების ფონდში არსებული სავარაუდო კორუფცია, გულგრილობა, დაუდევრობა არის მიზეზი იმისა, რომ მესაკუთრეებთან გაფორმებული ხელშეკრულება არ სრულდება. სარეაბილიტაციო სამუშაოები ვადების დარღვევით, უხარისხოდ, არაკეთილსინდისიერად მიმდინარეობს. დარღვეულია თბილისის ისტორიული მემკვიდრეობის ავთენტური ნაწილის რეაბილიტაციის ნორმები. იმის ნაცვლად, რომ ფონდი რეაგირებდეს მესაკუთრეების წერილებზე, პირიქით, მუქარაზე გადავიდა და მესაკუთრეებს ეუბნება, რომ ხელშეკრულებებს გაწყვეტს“, - განაცხადა ფარულავამ, რომლის კომენტარსაც „ერთიანი ნაციონალური მოძრაობის“ პრესსამსახური ავრცელებს.