ვახტანგ ძაბირაძე - მმართველმა ძალამ ჩათვალა, რომ ჩხენკელმა ვერ უზრუნველყო სტუდენტების ნეიტრალიზება - ამილახვარს ექნება დავალება, შეძლოს არასასურველი გამოხტომების თავიდან აცილება, როგორც ჩანს, რეპრესიული გადაწყვეტილებები იქნება მიღებული

ექსპერტ, ვახტანგ ძაბირაძის შეფასებით, იმისათვის, რომ გიორგი ამილახვარმა განათლების მინისტრის პოსტზე „ქართული ოცნების“ იმედები გაამართლოს, მას ექნება დავალება - „შეძლოს სტუდენტური მოძრაობების რეგულირება და არასასურველი გამოხტომების თავიდან აცილება“.

როგორც ძაბირაძემ „ინტერპრესნიუსს“ განუცხადა, „როგორც ჩანს, რეპრესიული გადაწყვეტილებები იქნება მიღებული“.

ექსპერტის თქმით, ცვლილება განპირობებულია არა განათლების სისტემის გაუმჯობესების ან არსებული პრობლემების გამო, არამედ მმართველმა ძალამ ჩათვალა, რომ ჩხენკელმა ვერ უზრუნველყო სტუდენტების ნეიტრალიზება მარტის პროტესტთან დაკავშირებით.

„მიხეილ ჩხენკელის გიორგი ამილახვრის კანდიდატურით ჩანაცვლებით ამილახვრის მიმართ ალბათ, ახალი დირექტივები იქნება. ცხადია, გადაწყვეტილება არანაირი განათლების სისტემის გაუმჯობესების ან განათლების სისტემაში არსებული პრობლემების გამო არ არის მიღებული. აქ, ერთადერთი რამ არის - მმართველმა ძალამ ჩათვალა, რომ ჩხენკელმა ვერ უზრუნველყო სტუდენტების ნეიტრალიზება მარტის მოვლენებთან დაკავშირებით. რა დავალებაც დღეს ამილახვარს ექნება იმისთვის, რომ განათლების მინისტრის პოსტზე მან „ქართული ოცნების“ იმედები გაამართლოს, ეს იქნება მცდელობა იმის, რომ შეძლოს სტუდენტური მოძრაობების რეგულირება და არასასურველი გამოხტომების თავიდან აცილება. ანუ, როგორც ჩანს, რეპრესიული გადაწყვეტილებები იქნება მიღებული და თუ როგორ, ეს ძალიან მალე გამოჩნდება, მაგრამ დარწმუნებული ვარ, რომ რა თქმა უნდა, ეს შედეგს არ გამოიღებს. სტუდენტობა, ის ხალხი არ არის, რომელიც რეპრესიებს შეუშინდება ან რეპრესიების გამო კომპრომისულ ნაბიჯებს გადადგამს“, - განაცხადა ვახტანგ ძაბირაძემ.

მან შეაფასა ამილახვრის განცხადება, რომ „უფრო აქტიურად და ფართოდ უნდა გავაღოთ კარი ევროპული და დასავლური განათლების შემოსაშვებად საქართველოში“.

ვახტანგ ძაბირაძის თქმით, რა თქმა უნდა, ამილახვარმა ეს ყველაფერი თქვა იმისათვის,რომ შეფუთოს ის მიზანი, რისთვისაც ის რეალურად დაინიშნა პოსტზე.

„რა თქმა უნდა, ხომ არ იტყოდა, იმისათვის მოვედი, რომ სტუდენტების აქტივობების ნეიტრალიზება მოვახდინოო? პროცესიდან გამომდინარე, ზოგადად რომ თქვა, განათლების მინისტრს კატასტროფული არაფერი გაუკეთებია, რაც[გაუკეთებია] აღმასრულებელი ხელისუფლების ნებისმიერ მინისტრს. რაღაცნაირად ამოვარდნილი განათლების მინისტრი არ ყოფილა, ჩვეულებრივი რიგითი მინისტრი იყო, ისევე, როგორც დანარჩენი ყველა. ამიტომ,განათლების პრობლემების გამო რომ არ მომხდარა ცვლილება, ცხადია და თუ ცვლილება რამეს უკავშირდება, უკავშირდება სწორედ იმ მოვლენებს, რაც მარტში განვითარდა და სადაც ხელისუფლებისგან მოულოდნელად სტუდენტური ახალგაზრდობა ჩართული აღმოჩნდა. რა თქმა უნდა, ის, რაც თქვა შეფუთვაა. აქამდე დასავლური განათლებისთვის კარი გაღებული არ გვქონდა, თუ რა ხდება? სხვათა შორის, განათლების ეს მინისტრი განათლების კომიტეტის თავმჯდომარის პოზიციას იკავებდა და სად იყო ეს დალოცვილი აქამდე, თუ კარი დახურული იყო და ქვეყანა ინგრეოდა? მას ხომ შეეძლო ამაზე ერთხელ მაინც, კრიტიკული თუ არა, რაღაცნაირად მიმანიშნებელი განცხადება გაეკეთებინა, რომ სისტემაში რაღაც რიგზე ვერ არის!“, - განაცხადა ძაბირაძემ.