ბატონო იაგო, ალბათ გულში და გონებაში გაქვთ ეს და ამიტომ წამოგცდათ არაერთხელ, თითქოს მე ვთქვი, რომ ჯარი დისკრედიტირებულია - ძალიან გთხოვთ, პატივი ეცით ქართულ ჯარს, - ასე მიმართა თავდაცვის მინისტრის მოადგილე გრიგოლ გიორგაძემ „გირჩის“ დეპუტატ იაგო ხვიჩიას პარლამენტის პლენარულ სხდომაზე, სადაც „თავდაცვის კოდექსის“ განხილვა უკვე მეორე დღეა მიმდინარეობს.

როგორც გიორგაძემ აღნიშნა, საკითხთან დაკავშირებით „გირჩის“ წუხილი ვიწროპარტიული და ფინანსური ინტერესებითაა გამოწვეული.

„ბატონო იაგო, ნუ გაავრცელებთ სიცრუეს. საუბარი მქონდა იმაზე, რომ დღევანდელი გაწვევის სისტემა სწორი არაა, ვინაიდან თავდაცვის მიზნებისთვის უნდა მოხდეს გამოყენება და მხოლოდ თავდაცვის უწყებაში იყოს წვრთნა და გადამზადება. თქვენ ალბათ გულში და გონებაში გაქვთ და ამიტომ წამოგცდათ არაერთხელ, თითქოს მე ვთქვი, რომ ჯარი დისკრედიტირებულია. შეგვიძლია რომ დღევანდელ ჯარზე ეს ვისაუბროთ? პირიქით, საამაყო გვაქვს მიღწევები პროფესიულ სამხედრო სამსახურშიც, შესაბამისად, ძალიან გთხოვთ, პატივი ეცით ქართულ ჯარს, არაერთხელ მიაყენეთ შეურაცხყოფა. გასაგებია, საიდანაა გამოწვეული თქვენი წუხილი -მხოლოდ კონკრეტული, ვიწროპარტიული და ფინანსური ინტერესებით, თუმცა ჩვენ სხვა საზრუნავი გვაქვს და ჩვენი ინტერესები ერთმანეთს, რა თქმა უნდა, არ ემთხვევა“,- განაცხადა გრიგოლ გიორგაძემ.

გიორგაძის აღნიშნული გამოსვლა ხვიჩიას იმ განცხადებას მოჰყვა, სადაც მან აღნიშნა, რომ საკუთარი ჯარი თავად მინისტრის მოადგილესაც არ მოსწონს.

„თქვენვე რომ არ მოგწონთ საკუთარი ჯარი, იმ პირობებში ევროპაში სამუშაოდ წასული ადამიანი რომ არ ჩამოვიდეს და თქვენ რომ მას ავტომატურად კრიმინალად თუ დეზერტირად აცხადებთ, ამის გამო მას დისკომფორტი უნდა შეექმნას საქართველოში შემდეგ ჩამოსვლაზე? ეს ხალხი საერთოდ რომ არ ჩამოვა იმის გამო, რომ „ვიშკაზე“ დგომა არ უნდა და 2025 წლამდე, თქვენივე ლოგიკით, ნორმალურ სარეზერვო სამსახურსაც ვერ სთავაზობთ; ამ რეალობაში რომ ხალხი არ ჩამოვიდეს იმ არგუმენტაციით, რომ ეს ჯარი არ ვარგა და რეპუტაცია შერყეული აქვს, გისმენენ და გიჯერებენ, აქ არ ჩამოისვლებაო, ამის გამო რომ კრიმინალად ვაცხადებთ, ამაზე პასუხისმგებლობა, თქვენი აზრით, ვის ეკისრება?“,- განაცხადა იაგო ხვიჩიამ.