თქვენ როცა დაასახელებთ იმ ხალხს, რომელიც თქვენზე ახდენდა ზეწოლას, რომ მხარი არ დაგეჭირათ ომბუდსმენისთვის, მერე ილაპარაკეთ თავისუფალ მანდატზე - ასე მიმართა პარლამენტის თავმჯდომარე შალვა პაპუაშვილმა, ოპოზიციონერ დეპუტატ თეონა აქუბარდიას, რომელმაც მმართველ გუნდს თანაფრაქციელებისთვის სადეპუტატო მანდატების შეწყვეტის შესახებ გადაწყვეტილების მიღებისას პარლამენტის წევრის თავისუფალი მანდატის არსებობა შეახსენა.

აქუბარდიამ მადლობა გადაუხადა დეპუტატებს „ქართული ოცნებიდან“, რომლებმაც ე.წ. აგენტების შესახებ კანონპროექტს ხმა არ მისცეს.

„მინდა მადლობა გადავუხადო როგორც გენერალ ჩაჩიბაიას, ასევე ყველა იმ დეპუტატს, რომელმაც მწვანე ღილაკს არ დააჭირა ამ კანონზე [ე.წ აგენტების შესახებ კანონი] და ამით დააფიქსირა თავისი პოზიცია, ქვეყნის ევროატლანტიკური და ევროპული ინტეგრაციის გზაზე. შესაბამისად, გამომდინარე იმ უხერხული მდგომარეობიდან, რომელ უხერხულ მდგომარეობაშიც თქვენ ჩააყენეთ ეს ადამიანები და რომელსაც თქვენ აქ ქმნით, კენჭისყრაში მონაწილეობას არ მივიღებთ. ძალიან სამწუხარო რეალობა შექმენით თქვენ ისევ და ისევ თავისუფალი მანდატის წართმევასთან მიმართებით, თუმცა ჩემი პატივისცემა მინდა დავაფიქსირო, რამდენადაც მათ არ გამოიყენეს მწვანე ღილაკი იმ კანონზე, რომელიც ქვეყნის საგარეო ვექტორის წინააღმდეგ იყო მიმართული“, - განაცხადა თეონა აქუბარდიამ.

გარდა ამისა, „ქართული ოცნების“ დეპუტატებისთვის მანდატების შეწყვეტის საკითხის კენჭისყრაში მონაწილეობაზე უარი განაცხადა „ლელოს“ დეპუტატმა დავით უსუფაშვილმაც.

ცნობისთვის, სადეპუტატო უფლებამოსილება უმრავლესობის დეპუტატებს: ირაკლი კოვზანაძეს, გიორგი ხელაშვილს, ვლადიმერ ჩაჩიბაიას, ნინო იობაშვილსა და გიორგი ამილახვარს უწყდებათ.