კონსტიტუციაში წერია, რომ პარლამენტის საგამოძიებო კომისიის შექმნის უფლება არსებობს, მაგრამ კონსტიტუციაში ასევე წერია, რომ პარლამენტარის მანდატი არაფრით იზღუდება, ანუ მე რაღაცას ვუყრი თუ არა კენჭს, ესეც ჩემი კონსტიტუციურად გარანტირებული უფლებაა, - ამის შესახებ სასამართლოსთან დაკავშირებით საგამოძიებო კომისიის შექმნის ინიციატივაზე საპროცედურო საკითხთა და წესების კომიტეტის თავმჯდომარემ ირაკლი ქადაგიშვილმა განაცხადა.

ქადაგიშვილი კვლავ აცხადებს, რომ პარლამენტის საგამოძიებო კომისიის შექმნა სასამართლო ხელისუფლების საქმიანობაში პოლიტიკური ხელისუფლების ჩარევას ნიშნავს, რაც დაუშვებელია.

„სასამართლო ხელისუფლებისა და სამართლის ბალანსის ერთადერთი მექანიზმია. ევროპული ტიპის საპარლამენტო რესპუბლიკაში აღმასრულებელი და საკანონმდებლო ხელისუფლება ძალიან მჭიდრო კორელაციაშია. ამიტომ სასამართლო ხელისუფლება აბსოლუტურად დამოუკიდებელია. სასამართლო ხელისუფლებაში პოლიტიკური ხელისუფლების ჩარევა სასამართლო ხელისუფლებას დააზიანებს, მით უფერო რომ არსებობს პოლიტიკური პროპაგანდის მიერ ჩამოყალიბებული მოცემულობები და ამ მოცემულობების გამო პოლიტიკური ზეწოლის მექანიზმი უნდა შევქმნათ.

თუ საკანონმდებლო ბაზას გადავხედავთ, საქართველოს სასამართლო მოწყობა არის ერთ-ერთი საუკეთესო ევროპული სტანდარტით. ვერ მოიძებნა ვერც ერთი ქეისი, როცა სტრასბურგის სასამართლო იტყოდა, რომ საქართველოს სასამართლოს მიერ მიღებული გადაწყვეტილება განგაშის საფუძველს იძლევა, როგორც ეს გირგვლიანისა და მოლაშვილის საქმეებზე იყო. ყველაზე სენსიტიურ - მედიის თემაზეც კი, სტრასბურგის სასამართლომ ვერ თქვა, რომ საქართველოს სასამართლოს გადაწყვეტილებას რაიმე ხარვეზი ჰქონდა“, - განაცხადა ირაკლი ქადაგიშვილმა.