ოკუპირებული აფხაზეთის ე.წ. საგარეო საქმეთა სამინისტრომ განაცხადა, რომ მას შეუძლია შეაჩეროს ამა თუ იმ საერთაშორისო არასამთავრობო ორგანიზაციის (INGO) ან გაეროს სააგენტოების მიმდინარე პროექტები - „თუ არ იქნება უზრუნველყოფილი საქმიანობის გამჭვირვალობა და ანგარიშვალდებულება". ამის შესახებ „ეხო კავკაზა“ იუწყება.
დე ფაქტო უწყებაში აცხადებენ, რომ პროექტებისა და პროგრამების განხორციელების მონიტორინგის ფარგლებში მათ მოითხოვეს შეხვედრა გაეროს განვითარების პროგრამის (UNDP) აფხაზეთის ოფისის ხელმძღვანელთან.
„ამ მოთხოვნის პასუხად მივიღეთ წერილი „საჭირო ინფორმაციის მიწოდების ალტერნატიული ფორმების განხილვის წინადადებით და არა პოლიტიკურ დონეზე შეხვედრის შესახებ“. არასამთავრობო ორგანიზაციების მხრიდან მსგავსი ქმედებები კითხვის ნიშნის ქვეშ აყენებს მათი საქმიანობის გამჭვირვალობას“, - ნათქვამია განცხადებაში.