1 მილიონი ეთნიკური ქართველი, ჩვენი თანამემამულე გვყავს რუსეთში და, რა თქმა უნდა, ძალიან მნიშვნელოვანია, რომ გაადვილდეს მათი მოძრაობა, მიმოსვლა, ახლობლების ჩასვლა და ა.შ. ეს არის, რა თქმა უნდა, დადებითი ფაქტი და დადებითი გადაწყვეტილება , - ამის შესახებ საქართველოს პრემიერ-მინისტრმა ირაკლი ღარიბაშვილმა საქართველოსთან პირდაპირი ფრენების აღდგენისა და სავიზო რეჟიმის გაუქმების შესახებ რუსეთის პრეზიდენტის გადაწყვეტილების შესახებ განაცხადა.

პრემიერმა თავის განცხადებაში გაიხსენა 2008 წლის აგვისტოს ომის შემდეგ არსებული ვითარება და აღნიშნა, რომ მიხეილ სააკაშვილის პრეზიდენტობის დროს ომის შემდეგ საქართველომ ცალმხრივად მოუხსნა ვიზები რუსეთის მოქალაქეებს.

„მე მინდა ჩვენს ხალხს კიდევ ერთხელ შევახსენო და განვუმარტო ქრონოლოგიურად, როგორ მოვედით დღემდე. დავიწყებ უვიზო რეჟიმით: რუსეთის ფედერაციის გადაწყვეტილების შესაბამისად, ჩვენს მოქალაქეებს აღარ დასჭირდებათ ვიზები, რომ წავიდნენ რუსეთში. ჩვენ არაერთხელ გვითქვამს და ეს არის ფაქტი, რომ 1 მილიონი ეთნიკური ქართველი ჩვენი თანამემამულე გვყავს რუსეთში, მათ აქ ჰყავთ ოჯახის წევრები, ნთესავები, ახლობლები და, რა თქმა უნდა, ძალიან მნიშვნელოვანია, რომ გაადვილდეს მათი მოძრაობა, მიმოსვლა, ახლობლების ჩასვლა და ა.შ. ეს არის, რა თქმა უნდა, დადებითი ფაქტი და დადებითი გადაწყვეტილება.

რაც შეეხება ზოგადად უვიზო მიმოსვლას, მინდა შევახსენო ჩვენს საზოგადოებას, რომ ჩვენამდე, მაშინ ბატონი სააკაშვილი იყო პრეზიდენტი, ცალმხრივად, ისე რომ არაფერი მოუთხოვია, არც მოლაპარაკებები გამართულა და არაფერი, აგვისტოს ომის შემდეგ, როცა ტერიტორიების 20% დავკარგეთ და რუსეთმა ბაზები ააშენა, გამოვიდა წინა ხელისუფლება და ცალმხრივად გააუქმა სავიზო რეჟიმი. ასევე, უნდა შეგახსენოთ, რომ პირადად ხვდებოდა რუს ტურისტებს. ასევე, გახსოვთ ცნობილი გამონათქვამები, რომ რა მნიშვნელობა ჰქონდა, საიდან შემოვიდოდა ინვესტიციები და ეს ყველაფერი ხდება ომის შემდეგ. ნაცვლად იმისა, რომ გონივრული, სახელმწიფოებრივი პოლიტიკა გამოეჩინათ და პოზიცია გამოეჩინათ, სანაცვლოდ უვიზო რეჟიმი მაინც მოეთხოვათ, ასე ერთპიროვნულად, ყოველგვარი პირობის გარეშე მოხსნეს უვიზო რეჟიმი. ახლა კითხვას, ალბათ, დამისვამთ თუ რომელიმე ასოცირებულ ქვეყანას - უკრაინას, მოლდოვას აქვს უვიზო რეჟიმი რუსეთთან - ჩვენამდე ჰქონდა უკრაინასაც და მოლდოვას დღესაც აქვს უვიზო რეჟიმი რუსეთთან. ასევე, შეგახსენებთ, რომ მოლდოვა არის დსთ-ს წევრი. რატომ გავაკეთე ასეთი ვრცელი კომენტარი, მინდა ყველას ვუთხრა, რომ ეს, რა თქმა უნდა, ჰუმანიტარული თვალსაზრისით ძალიან დადებითი, მისასალმებელი, გადაწყვეტილება იყო და არის. ყველაფერი, რაც ჩვენს მოქალაქეებს გაუადვილებს, გაუმარტივებს ცხოვრებას, გადაადგილებას, ბიზნესის კეთებას, რა თქმა უნდა, არის დადებითი და მისასალმებელი“,- განაცხადა ირაკლი ღარიბაშვილმა.