ჩვენი მთავარი ინტერესი იმაშია, რომ საქართველომ წესები უნდა დაიცვას, როგორც ყველა დანარჩენმა ევროპულმა ქვეყანამ, - ამის შესახებ საქართველოში საბერძნეთის ელჩმა მარია თეოდორუმ იუსტიციის მინისტრთან შეხვედრის შემდეგ ჟურნალისტებთან საუბარში განაცხადა.

“შეხვედრა გვქონდა იუსტიციის მინისტრთან, რათა მიგვეღო ინფორმაცია ბოლო მოვლენების შესახებ მიხეილ სააკაშვილთან დაკავშირებით სტრასბურგის სასამართლოს გადაწყვეტილების შემდეგ. როგორც ყოველთვის, ჩვენი საუბარი ძალიან პროდუქტიული და მეგობრული იყო და ვფიქრობ, ბევრი განმარტება მოვისმინეთ ამ სიტუაციასთან დაკავშირებით.

ჩვენ ექიმები არ ვართ, ინფორმაციას, ისევე როგორც ყველა დანარჩენი ვიღებთ - მედიიდან და ა.შ. ჩვენი მთავარი ინტერესი იმაშია, რომ საქართველომ წესები უნდა დაიცვას, როგორც ყველა დანარჩენმა ევროპულმა ქვეყანამ, პატივი სცეს ყველა მოქალაქის უფლებებს. ეს არის ჩვენი მთავარი ინტერესი”, - განაცხადა თეოდორუმ.

სტრასბურგის სასამართლოს გადაწყვეტილებასთან დაკავშირებით, თეოდორუმ განაცხადა, რომ “ჩვენ იურისტები არ ვართ ” და “იუსტიციის მინისტრმა მთლიანი სურათი საკმაოდ ნათელი გახადა”.