ბრაზილიის პრეზიდენტი, ლუის ინასიო ლულა და სილვა აცხადებს, რომ საჭიროა, უკრაინაში არსებული ვითარების შესახებ გაერო-ს სამიტი ჩატარდეს.

„გაერო-ში უკრაინის ომის განხილვა აუცილებელია. ჩემი პრეზიდენტობის ხუთი თვის განმავლობაში არავის მივუწვევივარ გაერო-ს შეხვედრაზე ამ ომის განსახილველად. შეგვიძლია, გენერალური ასამბლეის შეხვედრა, რომელიც ჩვეულებრივ სექტემბერში იმართება, ომის საკითხის განსახილველად ივნისში ან ივლისში გადმოვიტანოთ“, - აღნიშნა ბრაზილიის პრეზიდენტმა.

მისი თქმით, ასეთ ღონისძიებაზე სასაუბროდ უნდა მოიწვიონ როგორც რუსეთის პრეზიდენტი ვლადიმერ პუტინი, ასევე უკრაინის პრეზიდენტი ვოლოდიმირ ზელენსკი, რასაც შესაბამისი დისკუსია მოჰყვება. ლუის ინასიო ლულა და სილვა მიიჩნევს, რომ უკრაინაში არსებული ვითარების განხილვა არც „დიდი შვიდეულის“ და არც „დიდი ოცეულის“ ფორმატში არაა მიზანშეწონილი და ამის ნაცვლად, ეს საკითხი გაერო-ს უშიშროების საბჭოში უნდა განიხილებოდეს.