მედია - ბელგოროდში რუსეთის 2 ჯარისკაცი დაიღუპა, 4 კი დაშავდა
რუსეთის ფედერაციის ბელგოროდის ოლქის გრაივორონსკის რაიონში გუშინ დაბომბვის შედეგად, ორი რუსი ჯარისკაცი დაიღუპა, 4 კი - დაშავდა, - ინფორმაციას რუსული „ტელეგრამ“ არხი „Осторожно, новости“ ავრცელებს.
მათივე ინფორმაციით, დაბომბვა მრავალჯერადი სარაკეტო სისტემიდან, უკრაინის ტერიტორიიდან განხორციელდა.
„ჩვენი ინფორმაციით, გუშინ, დივერსანტების ბელგოროდის ოლქის ტერიტორიაზე შემოსვლისას, გრაივორონსკის რაიონი უკრაინის ტერიტორიიდან მრავალჯერადი სარაკეტო სისტემიდან დაბომბეს. თავდასხმა განხორციელდა დახურულ სამხედრო ქალაქზე, ე.წ. ბელგოროდ-22-ზეც. ობიექტის დაბომბვის შედეგად ორი რუსი ჯარისკაცი დაიღუპა და კიდევ ოთხი დაშავდა", - აღნიშნულია ინფორმაციაში.
შეგახსენებთ, გუშინ რუსულმა მხარემ გაავრცელა ინფორმაცია, რომ ბელგოროდის ოლქის ტერიტორიაზე უკრაინელი დივერსანტები შეიჭრნენ, სამხედროები და ძალოვანი სტრუქტურების წარმომადგენლები კი ყველა ზომას იღებდნენ მათი ლიკვიდაციისთვის. ვიაჩესლავ გლადკოვის თქმით, ოლქში ანტიტერორისტული ოპერაციის რეჟიმი დაწესდა. უკრაინული მხარე მათი სამხედროების რუსეთის ტერიტორიაზე შეჭრის შესახებ ინფორმაციას არ ადასტურებს. უკრაინის თავდაცვის სამინისტროს დაზვერვის მთავარი სამმართველოს წარმომადგენელმა, ანდრეი იუსოვმა განაცხადა, რომ ბელგოროდის ტერიტორიაზე სპეცოპერაციას „რუსეთის თავისუფლების ლეგიონისა“ და „რუსეთის მოხალისეთა კორპუსის“ წარმომადგენლები ახორციელებენ, რომლის მიზანი უკრაინელი მშვიდობიანი მოსახლეობის დასაცავად უსაფრთხოების გარკვეული ზონის შექმნაა.
v-if="article.gallery" v-html="article.gallery"
