რუსული მედია - ერევანი და ბაქო ტერიტორიული მთლიანობის ორმხრივ აღიარებაზე შეთანხმდნენ

სომხეთი და აზერბაიჯანი შეთანხმდნენ ტერიტორიული მთლიანობის ურთიერთ აღიარებაზე. ამის შესახებ რუსული მედია წერს.

სომხეთის პრემიერ-მინისტრმა ნიკოლ ფაშინიანმა ევრაზიული საბჭოს სამიტზე განაცხადა, რომ ბაქო და ერევანი წინ მიიწევენ ურთიერთობების მოწესრიგების მიმართულებით.

„ამის საფუძველზე ჩვენ კარგად მივიწევთ წინ ჩვენი ურთიერთობების მოწესრიგების მიმართულებით“ , - აღნიშნა ფაშინიანმა.

ამასთან, მან გაიხსენა საერთაშორისო მექანიზმის ფარგლებში მთიანი ყარაბაღის მცხოვრებლების უფლებებისა და უსაფრთხოების საკითხი.

„იმედი მაქვს, რომ ბაქოსა და სტეფანაკერტს შორის ნორმალური, კონსტრუქციული დიალოგი მოკლე დროში დაიწყება" , - აღნიშნა ფაშინიანმა.

თავის მხრივ, აზერბაიჯანის პრეზიდენტმა ილჰამ ალიევმა დასძინა, რომ ქვეყანას არ აქვს ტერიტორიული პრეტენზია სომხეთის მიმართ.

„ბაქოსა და ერევანს შორის სამშვიდობო შეთანხმების მიღწევის შესაძლებლობა არსებობს, განსაკუთრებით იმის გათვალისწინებით, რომ სომხეთმა ოფიციალურად აღიარა ყარაბაღი აზერბაიჯანის ნაწილად“ , - განაცხადა აზერბაიჯანის მეთაურმა.

ალიევმა აღნიშნა, რომ არსებობს სერიოზული წინაპირობები ურთიერთობის ნორმალიზებისთვის, რომელიც ეფუძნება ერთმანეთის ტერიტორიული მთლიანობის აღიარებას.

რუსეთის პრეზიდენტმა ვლადიმერ პუტინმა იმედი გამოთქვა, რომ სომხეთისა და აზერბაიჯანის ლიდერებთან სამმხრივი შეხვედრა ყველა უთანხმოების განხილვას შეძლებს.

ამასთან, რუსეთის ლიდერმა ხაზი გაუსვა მხარეთა პრინციპული შეთანხმებების მნიშვნელობას ტერიტორიული მთლიანობის საკითხზე. მისი თქმით, ამ საკითხზე შეთანხმება შეიძლება გახდეს კონსენსუსის საფუძველი სხვა მეორეხარისხოვან საკითხებზე, თუმცა მათ ასევე დიდი მნიშვნელობა აქვს.

ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს