ევროკავშირი მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში, - ამის შესახებ ევროპარლამენტარმა მარინა კალიურანდმა ბრიუსელში, ევროპარლამენტში ევროკავშირი-საქართველოს საპარლამენტო ასოცირების კომიტეტის (PAC) მე-12 სხდომაზე განაცხადა.

„როგორც იცით, ევროკავშირი მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში, და ასევე ე.წ. „რესპუბლიკების“ არაღიარების პოლიტიკას, რომლებშიც რუსული ჯარები და მესაზღვრეები უკანონოდ იმყოფებიან.

ევროპარლამენტი ახლოდან აკვირდება ოკუპირებულ ტერიტორიებზე არსებულ ვითარებას, ასევე, საოკუპაციო ხაზთან ახლოს მცხოვრები ხალხის სტატუსსა და უფლებებს. როგორც უკვე ვახსენე, წინა სექტემბერს ჩვენი მისია საქართველოში განსაკუთრებით რელევანტური იყო, ვინაიდან EUMM-იდან კოლეგებთან ერთად შევძელით საოკუპაციო ხაზის მონახულება.

ევროპარლამენტი მხარს უჭერს საქართველოს მცდელობებს წინ წაიწიოს კონფლიქტების მშვიდობიანად მოგვარებაში მოლაპარაკებებისა და დიპლომატიის მეშვეობით, მათ შორის ჟენევის საერთაშორისო დისკუსიებით, იმ ხალხისადმი მიწვდომის მცდელობებს, რომლებიც საოკუპაციო ხაზის ორივე მხარეს ცხოვრობენ, როგორც ნაჩვენებია „ნაბიჯი უკეთესი მომავლისკენ” სამშვიდობო ინიციატივით. ევროპარლამენტი ასევე მიესალმება ევროკავშირის აქტიურ წვლილს მშვიდობიან პროცესში სამხრეთ კავკასიაში სპეციალური წარმომადგენლის, ტოივო კლაარის წარდგენით და EUMM-ის მეშვეობით.

სამწუხაროდ, 2008 წლის ევროკავშირის შუამდგომლობით მიღწეული ცეცხლის შეწყვეტის შესახებ შეთანხმებით დარღვევით EUMM-ს საშუალება არ მიეცა ოკუპირებული ტერიტორიები მოენახულებინა, რაც, რა თქმა უნდა, ავიწროებს მათი ქმედებების მასშტაბს“, - განაცხადა კალიურანდმა.