ოკუპირებული „სამხრეთ ოსეთის“ ე.წ. პრეზიდენტი ალან გაგლოევი პეტერბურგის საერთაშორისო ეკონომიკური ფორუმის მუშაობაში მიიღებს მონაწილეობას. ამის შესახებ ინფორმაციას ე. წ. პრეზიდენტის პრესსამსახური ავრცელებს.

დელეგაციის შემადგენლობაში ასევე შედიან ოკუპირებული „სამხრეთ ოსეთის“ ე.წ. ეკონომიკური განვითარების ვიცე პრემიერ-მინისტრი ძამბოლატ თადტაევი, რუსეთში ე.წ. ელჩი ზნაურ გასიევი და სავაჭრო წარმომადგენელი თაიმურაზ გოგინოვი.

„ფორუმის ფარგლებში შედგება რუსეთის ფედერაციის სუბიექტებთან რიგი შეთანხმებების ხელმოწერა სავაჭრო-ეკონომიკურ, სამეცნიერო-ტექნიკურ და სოციალურ-კულტურულ სფეროში ", - ნათქვამია ე. წ. პრეზიდენტის პრესსამსახურის განცხადებაში.

მათივე ცნობით, ალან გაგლოევი ასევე მიიღებს მონაწილეობას ფორუმის პლენარულ სხდომაში, სადაც შეხვდება ბიზნესმენებს და პოლიტიკოსებს.