პოლონეთს არ სურს, რომ იენს სტოლტენბერგის შემდეგ ნატო-ს გენმდივანი ისევ ერთ-ერთი სკანდინავიური ქვეყნის წარმომადგენელი გახდეს. ამ ინფორმაციას The Wall Street Journal-ი აქვეყნებს.

როგორც გამოცემა წერს, ვარშავა მხარს არ უჭერს დანიის პრემიერ-მინისტრის მეტე ფრედერიქსენის კანდიდატურას, რომელიც ნატოს გენერალური მდივნის პოსტზე ერთ-ერთ ფავორიტად ითვლება.

მათივე ცნობით, პოლონეთში თვლიან, რომ ორგანიზაციის ახალი ხელმძღვანელი ალიანსის აღმოსავლეთის ფლანგის წარმომადგენელი უნდა იყოს, ამიტომ მეტე ფრედერიქსენის ალტერნატივად ესტონეთის პრემიერ-მინისტრი კაია კალასი მიაჩნიათ.

თვითონ იენს სტოლტენბერგი დარწმუნებულია, რომ ნატოში მას ღირსეული ადამიანი შეცვლის.

როგორც სტატიაშია აღნიშნული, წინა კვირას ალიანსის გენერალური მდივნის პოსტზე დიდი ბრიტანეთის პრემიერ-მინისტრმა რიში სუნაკმა უშუალოდ აშშ-ს პრეზიდენტ ჯო ბაიდენს დიდი ბრიტანეთის თავდაცვის მინისტრის ბენ უოლესის კანდიდატურა შესთავაზა.