გაერო-ს უშიშროების საბჭო დღეს შეიკრიბება, რათა კახოვკას ჰიდროელექტროსადგურის აფეთქების შედეგები და ზაპოროჟიეს ატომურ ელექტროსადგურზე ტერაქტის საფრთხე განიხილონ, - ინფორმაციას უკრაინული მედია ავრცელებს.

მათივე ინფორმაციით, შეხვედრა აშშ-სა და ალბანეთის ინიციატივით გაიმართება.

გაერო-ს გენერალური მდივნის მოადგილე პოლიტიკურ საკითხებში, როზმარი დიკარლო ორგანიზაციის სახელით ისაუბრებს უკრაინაში უსაფრთხოებისა და ჰუმანიტარული ვითარების შესახებ.

22 ივნისს, უკრაინის პრეზიდენტმა ვოლოდიმირ ზელენსკიმ დაზვერვის მონაცემებზე დაყრდნობით განაცხადა, რომ რუსეთი ზაპოროჟიეს ატომურ ელექტროსადგურზე ტერაქტის განსახორციელებლად ემზადება.

ზელენსკის განცხადება რუსეთის პრეზიდენტის პრესსპიკერმა, დიმიტრი პესკოვმა სიცრუედ შეაფასა.

„ეს არის მორიგი ტყუილი. მოგეხსენებათ, ახლახან გვქონდა კონტაქტი ატომური ენერგიის საერთაშორისო სააგენტოსთან და მათგან ძალიან მაღალი შეფასებაც მივიღეთ. მათ დაინახეს ყველაფერი, რისი დანახვაც სურდათ“, - განაცხადა დიმიტრი პესკოვმა.