ლატვია „რუსეთში შიდა პოლიტიკური მოვლენების არაპროგნოზირებადი განვითარების გამო“, რუსებისთვის ყველა სახის ვიზების გაცემას წყვეტს.

ქვეყნის საგარეო საქმეთა სამინისტროს განცხადებაში ნათქვამია, რომ 26 ივნისიდან ლატვიის დიპლომატიური და საკონსულო წარმომადგენლობები საზღვარგარეთ შეწყვეტენ ყველა სახის სავიზო განაცხადის მიღებას რუსეთის მოქალაქეებისგან.

უწყებაში განმარტავენ, რომ 25 ივნისამდე შემოსული სავიზო განაცხადები განიხილება.

24 ივნისს, "ვაგნერის" მეთაურის ევგენი პრიგოჟინის მიერ რუსეთში გადატრიალების მცდელობის ფონზე, ლატვიის პრეზიდენტმა ედგარს რინკევიჩმა რუსებისთვის ყველა სახის ვიზების გაცემის შეწყვეტის შესახებ გამოაცხადა, მათ შორის ჰუმანიტარული მიზნით.

მოგვიანებით, ლატვიის საგარეო საქმეთა სამინისტრომ განმარტა, რომ საუბარია იმაზე, რომ ვიზები არ გაიცემა მათზე, ვინც რუსეთს ტოვებს "ვაგნერის" აჯანყების ფონზე.