უკრაინის სამხედრო-საზღვაო ძალების შემადგენლობაში სანაპირო-სამხედრო ძალები აღადგინეს, რომლებმაც შარშან „ნეპტუნის“ რაკეტებით რუსული ფლოტის ფლაგმანი „მოსკოვი“ ჩაძირეს.

როგორც უკრაინის სამხედრო-საზღვაო ძალების სპიკერი, დიმიტრი პლეტენჩუკი აცხადებს, იმის წყალობით, რომ თურქეთი ჯერჯერობით ბოსფორის სრუტეში არცერთ სამხედრო ხომალდს არ ატარებს, რუსეთს არ აქვს შესაძლებლობა შავ ზღვაში თავისი დაჯგუფების შევსებისთვის, შესაბამისად, რუსული ხომალდები იძულებულნი არიან საკმაოდ შორს იდგნენ უკრაინის შესაბამისი ქვედანაყოფებისგან.

"ახლა რუსეთის სახომალდო შემადგენლობა შავი ზღვის აღმოსავლეთ და ჩრდილოეთ-აღმოსავლეთ ნაწილში იმყოფება. ვრცელდება ინფორმაცია იმის შესახებ, რომ მათი ნაწილი რეგიონალურ, აზოვის დაჯგუფებად გარდაიქმნება, მაგრამ ამას დიდი აზრი არ აქვს, რადგან გვახსოვს, რით დამთავრდა რუსული დიდი სადესანტო ხომალდებისთვის ბერდიანსკის ნავსადგურში გაჩერება - მაინც მივწვდებით", - განაცხადა დიმიტრი პლეტენჩუკმა.

რაც შეეხება ფლაგმან "მოსკოვის" ჩაძირვას, უკრაინის სამხედრო-საზღვაო ძალების სპიკერის თქმით, მისიგანადგურება, არა მარტო საიმიჯო დარტყმა იყო, არამედ ძალიან მნიშვნელოვანი შედეგი იმ თვალსაზრისით, რომ უნდა ეს ფლაგმანი რუსეთის შავი ზღვის დაჯგუფებას სადაზვერვო მონაცემებით უზრუნველყოფდა.

"უკრაინაში რუსეთის ჯარის ფართომასშტაბიანი შეჭრის პირველ დღეებში შავ ზღვაში, ჰორიზონტზე, ჯერ კიდევ მოჩანდა რუსული სადესანტო ხომალდები. ახლა ეს, უბრალოდ, შეუძლებელია. კრეისერ „მოსკოვის“ ჩაძირვა, მისი განადგურება, არა მარტო საიმიჯო დარტყმა იყო. უნდა გვესმოდეს, რომ ეს ფლაგმანი რუსეთის შავი ზღვის დაჯგუფებას სადაზვერვო მონაცემებით უზრუნველყოფდა და ასევე ჰაერსაწინააღმდეგო საფარველს ახორციელებდა ", - განმარტა სპიკერმა.