რუსეთის სახელმწიფო დუმამ ორმაგი მოქალაქეობის საკითხების მოგვარების შესახებ ოკუპირებულ აფხაზეთთან გაფორმებული „შეთანხმების“ რატიფიცირება მოახდინა, - ინფორმაციას რუსული მედია ავრცელებს.

შეთანხმების თანახმად, რუსეთის მოქალაქეები შეძლებენ ე.წ. „აფხაზეთის მოქალაქეობის“ მიღებას რუსეთის ფედერაციის მოქალაქეობაზე უარის თქმის გარეშე და პირიქით.

ამასთან, „შეთანხმებაში“ ასევე საუბარია სამხედრო სამსახურზე, კერძოდ, „პირები, რომლებიც ორივე მხარის მოქალაქენი არიან, სამხედრო სამსახურს შეასრულებენ იმ მხარეში, რომლის ტერიტორიაზეც მუდმივად ცხოვრობენ გაწვევის დროს“.

ოკუპირებული აფხაზეთის ე.წ. საგარეო საქმეთა მინისტრმა, ინალ არძინბამ და რუსეთის საგარეო საქმეთა მინისტრმა, სერგეი ლავროვმა ორმაგი „მოქალაქეობის“ საკითხების მოგვარების შესახებ ე.წ. შეთანხმებას ხელი 2022 წლის სექტემბერში მოაწერეს.