უკრაინის გენშტაბი - მძიმე ბრძოლები 4 მიმართულებით გრძელდება, უკრაინელებსა და რუსებს შორის 39 შეტაკება მოხდა
უკრაინაში ლიმანის, ბახმუტის, ავდიივკასა და მარინკას მიმართულებებით მძიმე ბრძოლები გრძელდება, რუსულ ძალებთან, გასული დღე-ღამის განმავლობაში, 39 საბრძოლო შეტაკება მოხდა, - ამის შესახებ უკრაინის შეიარაღებული ძალების გენერალური შტაბის დილის ანგარიშშია აღნიშნული.
უწყების ცნობით, რუსულმა ძალებმა, ბახმუტის მიმართულებით შეტევა დაიწყეს დონეცკის ოლქის მინკოვკასა და ბოგდანოვკას რაიონებში, მაგრამ უშედეგოდ. ამ მიმართულებით, რუსების საარტილერიო დაბომბვის შედეგად 10-ზე მეტი დასახლება დაზარალდა.
„ავდიივკას მიმართულებით, მტერმა წარუმატებელი შეტევითი მოქმედებები განახორციელა ქალაქ ავდიივკას მიდამოში. მარინკას მიმართულებით, ჩვენმა დამცველებმა მარინკას მახლობლად მტრის ყველა შეტევა მოიგერიეს“, - აცხადებენ გენშტაბში.
გენერალური შტაბის ინფორმაციით, ხერსონისა და ზაპოროჟიეს მიმართულებებით, მტრის ძირითადი ძალისხმევა კონცენტრირებულია უკრაინის ჯარების წინსვლის აღკვეთაზე.
