გაერო-ში რუსეთის წარმომადგენლის, გენადი გატილოვის განცხადებით, შავი ზღვის მარცვლეულის შეთანხმების სტატუს-კვოს შენარჩუნებისთვის საფუძველი არ არსებობს.

„რუსეთმა არაერთხელ გაახანგრძლივა გარიგება პოზიტიური ცვლილებების იმედით, თუმცა ის, რასაც ახლა ვხედავთ, არ გვაძლევს საფუძველს, სტატუს-კვოს შენარჩუნებაზე დავთანხმდეთ“, – განაცხადა გატილოვმა.

რუსეთსა და უკრაინას შორის გაერო-სა და თურქეთის შუამავლობით 2022 წლის ივლისში გაფორმებული შეთანხმება მიზნად ისახავს რუსეთის შეჭრის შედეგად შეჩერებული უკრაინული მარცვლეულის შავი ზღვის პორტებით უსაფრთხო ექსპორტს გლობალური სასურსათო კრიზისის თავიდან აცილების მიზნით. შეთანხმების ვადა 18 ივლისს იწურება.