ჩეხეთის პრეზიდენტის, პეტრ პაველის განცხადებით, მისი ქვეყანა მზადაა, მხარი დაუჭიროს უკრაინას ვილნიუსში დაგეგმილ ნატო-ს სამიტზე და წვლილი შეიტანოს მის ფინანსურ დახმარებაში.
„მიმაჩნია, რომ უკრაინას მხარი უნდა დავუჭიროთ ევროკავშირსა და ნატო-ში გაწევრიანებისკენ სწრაფვაში. ყველაფერს გავაკეთებთ ამისთვის. ვეცდებით, რომ მოლაპარაკებების პროცესი მიმდინარე წლის ბოლომდე დაიწყოს და მკაფიოდ იყოს ნათქვამი, რომ ევროპა მომავალში უკრაინასთან იქნება“, - აღნიშნა ჩეხეთის პრეზიდენტმა ვოლოდიმირ ზელენსკისთან შეხვედრის შემდეგ გამართულ ერთობლივ პრესკონფერენციაზე.
მისი თქმით, უკრაინას შეუძლია ჩეხეთის მხარდაჭერის იმედი ჰქონდეს. პეტრ პაველმა ხაზი გაუსვა, რომ უკრაინის მხარდაჭერა არა მხოლოდ ომისგან დაზარალებული ქვეყნის მხარდაჭერაა, არამედ, უპირველეს ყოვლისა, ეს არის დახმარება ყველა ევროპელისთვის.