კრემლი ვლადიმერ პუტინსა და რეჯეფ თაიფ ერდოღანს შორის პირდაპირ კონტაქტს არ გამორიცხავს
რუსეთის პრეზიდენტის პრესსპიკერის, დიმიტრი პესკოვის განცხადებით, რუსეთისა და თურქეთის პრეზიდენტებს შორის კონტაქტი უახლოეს მომავალშია შესაძლებელი.
„არ გამოვრიცხავთ უახლოეს მომავალში. თქვენ იცით, რომ პუტინი და ერდოღანი ხშირად და რეგულარულად ურთიერთობენ. პირისპირ კონტაქტის საკითხი არაერთხელ განხილულა“, - განუცხადა პესკოვმა ჟურნალისტებს.
მისი თქმით, კრემლი ყურადღებით დააკვირდება თურქეთში უკრაინის პრეზიდენტ ვოლოდიმირ ზელენსკის და მის თურქ კოლეგას რეჯეფ თაიფ ერდოღანს შორის შეხვედრის შედეგებს. მანამდე თურქულმა მედიამ გაავრცელა ინფორმაცია, რომ რეჯეფ თაიფ ერდოღანი უკრაინის პრეზიდენტ ვოლოდიმირ ზელენსკისთან შეხვედრის შემდეგ, „დიდი ალბათობით" მოლაპარაკებებს ვლადიმერ პუტინთანაც გამართავს.
