2023 წლის გამოცდები გრძელდება. 7 ივლისს, მთელი საქართველოს მასშტაბით გახსნილ 24 საგამოცდო ცენტრში ორ სესიად აბიტურიენტებმა გამოცდა მათემატიკაში ჩააბარეს.
შეფასებისა და გამოცდების ეროვნული ცენტრის დირექტორი სოფიო გორგოძე საგამოცდო პროცესის მიმდინარეობას გორსა და ახალციხეში გახსნილ საგამოცდო ცენტრებში გაეცნო, მისი მოადგილე ლევან საბაური კი გამოცდებს ხულოსა და ბათუმში გახსნილ საგამოცდო ცენტრებში აკვირდებოდა.
მათივე ცობით, დღევანდელმა საგამოცდო პროცესმა მშვიდ ვითარებაში ჩაიარა. ორივე სესიაზე გამოცხადდა აბიტურიენტთა 95%. არ ყოფილა დაგვიანების არც ერთი შემთხვევა.
შეგახსენებთ, რომ ერთიანი ეროვნული გამოცდები 3 ივლისს ქართული ენისა და ლიტერატურის გამოცდით დაიწყო. მომდევნო გამოცდას აბიტურიენტები 10 ივლისს ინგლისურ ენაში ჩააბარებენ. 6 ივლისიდან საგამოცდო პროცესში ჩაერთვნენ მასწავლებლები და მასწავლებლობის მსურველებიც. მათთვის სესიები 13 ივლისიდან განახლდება. სტუდენტთა საგრანტო კონკურსის მონაწილენი გამოცდას 13 ივლისს, მაგისტრანტობის კანდიდატები კი საერთო სამაგისტრო გამოცდას 27-28 ივლისს ჩააბარებენ. სულ 2023 წლის გამოცდებისათვის 75 000-ზე მეტი აპლიკანტია დარეგისტრირებული.
ინფორმაციას შეფასებისა და გამოცდების ეროვნული ცენტრი ავრცელებს.
