აშშ-ის პრეზიდენტი, ჯო ბაიდენი გაერთიანებულ სამეფოში ჩავიდა, სადაც დღეს პრემიერ-მინისტრს, რიში სუნაკს და მეფე ჩარლზს შეხვდება.

BBC-ის ინფორმაციით, მოსალოდნელია, რომ ბაიდენი და სუნაკი სხვადასხვა საკითხს, მათ შორის უკრაინაში მიმდინარე ომს განიხილავენ. გამოცემა წერს, რომ რამდენიმე მოკავშირე, მათ შორის გაერთიანებული სამეფო, შეშფოთებას გამოხატავს იმის გამო, რომ აშშ უკრაინისთვის კასეტური საბრძოლო მასალების მიწოდებას გეგმავს.

რიში სუნაკმა შეერთებული შტატები პირდაპირ არ გააკრიტიკა, მაგრამ განაცხადა, რომ გაერთიანებული სამეფო ერთ-ერთია იმ 123 ქვეყნიდან, რომელმაც ხელი მოაწერა კასეტური საბრძოლო მასალის კონვენციას, საერთაშორისო ხელშეკრულებას, რომელიც კრძალავს ამ სახის იარაღის წარმოებას ან გამოყენებას.

შეერთებული შტატები კი აცხადებს, რომ ასეთი საბრძოლო მასალის მიწოდება საჭიროა, რადგან უკრაინის იარაღის მარაგი მცირდება.

ჯო ბაიდენი გაერთიანებული სამეფოს შემდეგ კი ვილნიუსში, ნატო-ს სამიტზე დასასწრებად გაემგზავრება, სადაც ორ დღეს გაატარებს. ის მონაწილეობას მიიღებს ლიდერებთან შეხვედრებში და ვილნიუსის უნივერსიტეტში სიტყვით გამოვა. ლიეტუვის შემდეგ ბაიდენი ფინეთის დედაქალაქ ჰელსინკში ჩავა.