ნატო-ს თითოეული სამიტი ახალი შესაძლებლობაა და ამ შესაძლებლობას განსაკუთრებით ნატო-ს წევრი სახელმწიფოები უნდა იყენებდნენ - საქართველოს პარლამენტის თავმჯდომარის ღია წერილი მათთვის დასკვნების გამოსატანად სახელმძღვანელო წერილი შეიძლება იყოს , - ეს განცხადება ჟურნალისტებთან "ქართული ოცნების" დეპუტატმა რატი იონათამიშვილმა გააკეთა.
მისივე თქმით, პარლამენტის თავმჯდომარე ზუსტად სვამს აქცენტებს, რაც საერთაშორისო მშვიდობის უზრუნველყოფისთვის მნიშვნელოვანია.
"ნატო-ს საზღვრები მართლაც მშვიდობის საზღვრებია, ოღონდ ამას გაფართოვება სჭირდება, რადგან სამწუხაროდ, მხოლოდ დაპირებები ყოველთვის წამახალისებელი იქნება ისეთი აგრესორისთვის, როგორიც რუსეთია - რომელსაც საერთაშორისო სამართალი არ აინტერესებს, ორიენტირებულია მეზობელი ქვეყნების ოკუპაციაზე. არსებული პოლიტიკა გადასახედია იმ ჭრილში, რომ საერთაშორისო თვალსაზრისით ნატო-ს საზღვრების გაფართოვება მშვიდობის გაძლიერებას ნიშნავს", - განაცხადა რატი იონათამიშვილმა.
იონათამიშვილი იმასაც ამბობს, რომ ორი აქტორია, ვინც საუბრობს, რომ საქართველო ნატო-ს წევრობას არ იმსახურებს და არ შეიძლება ქვეყანა ნატო-ს წევრი გახდეს.
"საზღვარგარეთ რუსეთია, ქვეყნის შიგნით რადიკალური ოპოზიცია - "ნაციონალური მოძრაობა". მათ განცხადება დღესაც გააკეთეს, რომ თურმე ჩვენი ქვეყანა ნატო-ს წევრობას არ იმსახურებს. ამით ისინი შეურაცხყოფას აყენებენ სამხედროებს, ვეტარანებს, ვინც საერთაშორისო უსაფრთხოებას საკუთარი სიცოცხლის ფასად იცავდნენ. მათ ასეთი არჩევანი სადამდე მიიყვანთ, ამას ვნახავთ", - განაცხადა რატი იონათამიშვილმა.
