სტუდენტთა მხარდაჭერის მიზნით, პროექტის „მომავალი ჩვენია“ ფარგლებში საქართველოს განათლებისა და მეცნიერების სამინისტროსა და კომპანია „გალფს“ შორის ურთიერთთანამშრომლობის მემორანდუმი გაფორმდა, რომლის თანახმად წარჩინებული პირველკურსელები 2023-2024 სასწავლო წლის განმავლობაში ყოველთვიურად 300-ლარიან სტიპენდიას მიიღებენ.

მემორანდუმს ხელი საქართველოს განათლებისა და მეცნიერების მინისტრმა გიორგი ამილახვარმა და „გალფის“ დამფუძნებელმა ვანო ნაკაიძემ მოაწერეს.

დოკუმენტის თანახმად, კომპანია „გალფი“ 100 სტუდენტისთვის, რომლებმაც 2023 წლის ერთიან ეროვნულ გამოცდებში საუკეთესო შედეგი აჩვენეს, ერთი სასწავლო წლის განმავლობაში უზრუნველყოფს სტიპენდიის ჩარიცხვას ყოველთვიურად 300 ლარის ოდენობით.

სტიპენდია გაიცემა, ერთიანი ეროვნული გამოცდების შედეგების საფუძველზე, სტუდენტობის კანდიდატთა შორის უმაღლესი შედეგის მქონე 100 აბიტურიენტზე.

სასტიპენდიო პროგრამას „მომავალი ჩვენია“ უკვე მეორე წელია კომპანია გალფი ანხორციელებს.

კომპანია გალფის ერთ-ერთ მთავარ პრიორიტეტს ახალგაზრდა თაობის მხარდაჭერა და მათი ხელშეწყობა წარმოადგენს და კომპანია განათლების მიმართულებით მომავალშიც გეგმავს რიგ კამპანიებს.

(R)