რუსეთის პრეზიდენტი, ვლადიმერ პუტინი უკრაინაში ე.წ. სპეცოპერაციის მიმდინარეობას დადებითად აფასებს და აცხადებს, რომ რუსი სამხედროები გმირულად მოქმედებენ.

კერძოდ, კითხვაზე, როგორ აფასებს ე.წ. სპეცოპერაციის მიმდინარეობას, პუტინმა უპასუხა: „დადებითად“.

მისი მტკიცებით, უკრაინის შეიარაღებული ძალების კონტრშეტევას შედეგი არ მოაქვს.

"ჩვენი ჯარები გმირულად მოქმედებენ. მტრისთვის მოულოდნელად, ზოგიერთ მონაკვეთზე ისინი თავად მიდიან შეტევაზე, იკავებენ ყველაზე ხელსაყრელ პოზიციებს, სიმაღლეებს და ასე შემდეგ. მოწინააღმდეგის ყველა მცდელობა, გაერღვია ჩვენი თავდაცვა წარუმატებელი იყო მთელი კონტრშეტევის განმავლობაში. მოწინააღმდეგე წარმატებას ვერ აღწევს!" - აღნიშნა პუტინმა.