გაერო-ს გენერალური მდივანი, ანტონიო გუტერეში მკაცრად გმობს უკრაინის შავი ზღვის პორტებზე რუსეთის თავდასხმებს და აცხადებს, რომ სამოქალაქო ინფრასტრუქტურის განადგურება, შეიძლება, საერთაშორისო ჰუმანიტარული სამართლის დარღვევას წარმოადგენდეს, - ამის შესახებ გაერო-ს პრესსპიკერმა, სტეფან დუჟარიკმა განაცხადა.

„ამ თავდასხმების გავლენა მნიშვნელოვნად სცდება უკრაინის ფარგლებს. უკვე ვხედავთ ნეგატიურ ეფექტს ხორბლისა და სიმინდის გლობალურ ფასებზე, რაც ყველას აზარალებს“, - აღნიშნა სტეფან დუჟარიკმა.

მისი თქმით, გენერალური მდივანი ძალისხმევას არ დიშურებს, რათა უზრუნველყოს უკრაინული და რუსული საკვებისა და სასუქების საერთაშორისო ბაზრებზე გატანა, რაც ხელს შეუწყობს გლობალური შიმშილის წინააღმდეგ ბრძოლას და სურსათზე სტაბილური ფასების უზრუნველყოფას.

რუსეთმა გაერო-სა და თურქეთის შუამავლობით უკრაინასთან გაფორმებული შავი ზღვის მარცვლეულის შეთანხმება, რომელიც შავი ზღვის პორტების საშუალებით უკრაინული მარცვლეულისა და სოფლის მეურნეობის სხვა პროდუქტების უსაფრთხო ექსპორტის საშუალებას იძლეოდა, ორშაბათს დატოვა და შეთანხმების დატოვებიდან რამდენიმე საათის შემდეგ, უკრაინის პორტებზე თავდასხმები დაიწყო. უკრაინის სოფლის მეურნეობის მინისტრის, მიკოლა სოლსკის განცხადებით, დარტყმების შედეგად 60 000 ტონა მარცვლეული განადგურდა და მარცვლეულის ექსპორტის ინფრასტრუქტურის მნიშვნელოვანი ნაწილი დაზიანდა.