ჩაქვში მდებარე „დრიმლენდ ოაზისის“ ადვოკატი - 5 წლის ბავშვის დახრჩობის საქმეზე, სავარაუდოდ, უბედური შემთხვევა დადგინდება - ვიდეოჩანაწერებში სურათი აღბეჭდილია, მათი ამოღება დღეს მოხდება

ჩაქვში, „დრიმლენდ ოაზისში" 5 წლის ბავშვის დახრჩობის საქმეზე, სავარაუდოდ, უბედური შემთხვევა დადგინდება. აღნიშნულის შესახებ „ინტერპრესნიუსს“ „დრიმლენდ ოაზისის“ ადვოკატმა კახა წერეთელმა განუცხადა.

როგორც ის აღნიშნავს, გამოძიება აქტიურ რეჟიმში მიმდინარეობს და ისინი გამოძიებასთან სრულად თანამშრომლობენ.

ამასთან, ადვოკატი აცხადებს, რომ სასტუმროსთან არსებული ვიდეოკამერების ჩანაწერები იდენტიფიცირებულია, სადაც მომხდარის სურათი აღბეჭდილია. აღნიშნული ჩანაწერების ამოღება სავარაუდოდ, დღეს მოხდება.

„გამოძიების პირველი ეტაპი გარკვეულწილად გავლილია, ძალიან ბევრი მოწმე დაიკითხა, მათ შორის არიან სასტუმროს თანამშრომლები და ასევე, სხვა პირებიც. ვიდეოჩანაწერების იდენტიფიცირება მოხდა. ჩემი, როგორც ადმინისტრაციის წარმომადგენლის ვარაუდია, რომ უბედურ შემთხვევასთან გვაქვს საქმე, თუმცა, გამოძიება გრძელდება და ჩვენ მათთან თანამშრომლობას სრულად ვაგრძელებთ.

დეტალების გაჟღერებისგან თავს შევიკავებ, ვიდეოჩანაწერებში სურათი აღბეჭდილია, ეს ვიდეოჩანაწერები დაარქივებულია და მათი ამოღება დღეს მოხდება“, - განაცხადა წერეთელმა.

შეგახსენებთ, რომ ჩაქვში, სასტუმრო „ოაზისის“ აუზზე რამდენიმე დღის წინ 5 წლამდე ბავშვი დაიხრჩო.