უკრაინის წინააღმდეგ რუსეთის ომის შესახებ ინფორმაციით მანიპულირებისთვის ევროკავშირმა 7 პიროვნება და 5 ორგანიზაცია დაასანქცირა. ამის შესახებ განცხადება ევროკავშირის საბჭოს ვებგვერდზე გამოქვეყნდა.

განცხადების თანახმად, აღნიშნული კამპანია, რომელშიც რუსეთის სამთავრობო უწყებები და მთავრობასთან აფილირებული უწყებები იღებდნენ მონაწილეობას, მიზნად ისახავდა ინფორმაციის დამახინჯებას და უკრაინის წინააღმდეგ რუსეთის აგრესიული ომის მხარდამჭერი პროპაგანდის გავრცელებას.

“სამიზნეში ვიღებთ იმათ, ვინც ევროკავშირისა და წევრი სახელმწიფოების წინააღმდეგ უფრო ფართო კამპანიის ფარგლებში ინფორმაციით მანიპულირებითა და ჩარევით არის დაკავებული. ამ ახალი ჩამონათვალით ჩვენ ძლიერ სიგნალს ვაგზავნით, რომ ვიცით, როგორ მანიპულირებენ ჩვენი საინფორმაციო სივრცით და როგორ მოქმედებენ. ჩვენ მტკიცენი ვართ ჩვენს მიზანში მოვახდინოთ ამ საფრთხეების პრევენცია, შეკავება და ახალი ინსტრუმენტებით მათზე ეფექტური რეაგირება”, - განაცხადა ევროკავშირის უმაღლესმა წარმომადგენელმა ჯოზეფ ბორელმა.

კერძოდ, შეზღუდვები დაუწესა Inforos-ს და მის დამფუძნებელს. Inforos-ი ონლაინ რესურსია, რომელიც მჭიდროდ არის დაკავშირებული რუსეთის მთავარ სადაზვერვო სამმართველოსთან და პასუხისმგებელია 270 ონლაინ მედია რესურსის შექმნისთვის, რომლებიც უკრაინის წინააღმდეგ რუსეთის აგრესიული ომის მხარდამჭერ პროპაგანდას ავრცელებდნენ.

სასანქციო სიაში ასევე შევიდნენ: ANO Dialog (რუსული არასამთავრობო ორგანიზაცია, რომელიც მჭიდროდ არის დაკავშირებული პრეზიდენტის ადმინისტრაციასთან), რუსული დიასპორის ინსტიტუტი, სოციალური დიზაინის სააგენტო, Structura National Technologies, ორი რუსული IT კომპანია (რომელიც დეზინფორმაციის აღნიშნულ კამპანიაში იყო ჩართული), და ასევე ამ ორგანიზაციების წარმომადგენლები.