დასავლეთ აფრიკის ქვეყნებმა ნიგერს სანქციები დაუწესეს და ძალის გამოყენებით დაემუქრნენ იმ შემთხვევაში, თუ სამხედრო გადატრიალების ლიდერები ერთ კვირაში პრეზიდენტ მუჰამედ ბაზუმს ძალაუფლებას არ აღუდგენენ.

ECOWAS-ის ბლოკმა, რომელიც 15 ქვეყანას აერთიანებს და ეკონომიკურმა და სავალუტო კავშირმა, რომელშიც აფრიკის რვა ქვეყანაა გაწევრიანებული, განაცხადეს, რომ დაიხურება საზღვრები ნიგერთან, აიკრძალება კომერციული ფრენები, შეჩერდება ფინანსური ტრანზაქციები, გაიყინება ეროვნული აქტივები და შეწყდება დახმარების მიწოდება.

გუშინ, ნიგერის დედაქალაქ ნიამეში, საფრანგეთის საელჩოსთან სამხედრო გადატრიალების მომხრეები შეიკრიბნენ და ყოფილ კოლონიაზე საფრანგეთის გავლება გააპროტესტეს. მათ საფრანგეთის დროშები დაწვეს და საელჩოს შენობისთვის ცეცხლის წაკიდება სცადეს.

დემონსტრანტების ნაწილი რუსეთის პრეზიდენტ ვლადიმერ პუტინის მიმართ მხარდაჭერასაც გამოხატავდა და სკანდირებდა : "გაუმარჯოს პუტინს", "გაუმარჯოს რუსეთს" და "ძირს საფრანგეთი". პოლიციამ დემონსტრანტების დასაშლელად ცრემლსადენი გაზი გამოიყენა.

საფრანგეთის პრეზიდენტის, ემანუელ მაკრონის ოფისმა განცხადება გაავრცელა, სადაც აღნიშნულია, რომ საფრანგეთი დაუყოვნებლივ უპასუხებს მათ, ვინც ნიგერში საფრანგეთის მოქალაქეებს ან ობიექტებს თავს დაესხმება.

შეგახსენებთ, ნიგერში სამხედრო გადატრიალება რამდენიმე დღის წინ მოხდა, როდესაც ნიგერის საპრეზიდენტო გვარდიის წევრებმა პრეზიდენტი ბაზუმი დაამხეს და ძალაუფლება სამხედრო ხუნტას, სამშობლოს დაცვის ეროვნულ საბჭოს გადასცეს.