ბელარუსის თავდაცვის სამინისტროს პრესსამსახურის განცხადებით, თეირანში ჩატარებული შეხვედრის დროს ბელარუსისა და ირანის თავდაცვის მინისტრებმა სამხედრო თანამშრომლობის შეთანხმებას და მისი რეალიზების გეგმას მოაწერეს ხელი.

პრესსამსახურის ცნობით, შეხვედრის დროს მხარეებმა საერთაშორისო დღის წესრიგის აქტუალურ საკითხებზე და ასევე, სამხედრო სფეროში პერსპექტივებზე ისაუბრეს.

ირანის თავდაცვის მინისტრის, რეზა აშტიანის განცხადებით, ირანის საგარეო პოლიტიკაში ბელარუსი განსაკუთრებულ ადგილს იკავებს.

ირანული მედიის ცნობით, შეხვედრაზე, ასევე, უკრაინაში ფართომასშტაბიანი ომის საკითხები განიხილეს.

„თეირანი მხარს უჭერს დიპლომატიურ ძალისხმევას, მაგრამ, ამავდროულად, შეშფოთებულია ჩრდილოატლანტიკური ალიანის გაფართოებით, რომელიც რეგიონის სხვა ქვეყნების ინტერესების გათვალისწინების გარეშე ხდება“, - განაცხადა რეზა აშტიანმა.