უკრაინას აქვს საკუთარი წარმოების იარაღი, რითაც რუსეთის ტერიტორიაზე დარტყმის განხორციელება შეუძლია და პარტნიორებს იარაღს ოკუპირებული ტერიტორიების გასათავისუფლებლად სთხოვს, - ამის შესახებ უკრაინის ეროვნული უსაფრთხოებისა და თავდაცვის საბჭოს მდივანმა, ოლექსი დანილოვმა განაცხადა.

„შემიძლია ვთქვა: ჩვენ გვაქვს საკუთარი წარმოების იარაღი, რითაც შესაძლებელია რუსეთის ტერიტორიაზე დარტყმის განხორციელება და იმისათვის, რომ ჩვენი ოკუპირებული ტერიტორიების გათავისუფლება შევძლოთ, მივმართავთ პარტნიორ ქვეყნებს, რათა დაგვეხმარონ იმ იარაღით, რითაც ამ ტერიტორიების გათავისუფლებას შევძლებთ", - აღნიშნა დანილოვმა.

მან ხაზი გაუსვა, რომ გერმანიამ და საფრანგეთმაც ცოტა ხნის წინ შეცვალეს თავიანთი პოზიცია და ახლა მაქსიმალურად თანამშრომლობენ უკრაინასთან, აცნობიერებენ რა რუსეთის ფედერაციის ყველა მზაკვრობას, რომელიც გამოვლინდა არა მხოლოდ უკრაინაში დაწყებული ომის დროს, არამედ იმ მოვლენების დროსაც, რომლებიც დღეს აფრიკის კონტინენტზე ხდება.