არ მიმდინარეობს არანაირი განხილვა, რომ დეზინფორმაციასთან დაკავშირებით კანონი მივიღოთ - იმაზე საუბარი, რომ საკითხი მომავალში არ განიხილება, ერთი ან ათი წლის შემდეგ არ განიხილება და ამაზე ხატის წინაშე ფიცი დადო, არასწორია, - ამის შესახებ ჟურნალისტებს პარლამენტის პირველმა ვიცე-სპიკერმა გია ვოლსკიმ განუცხადა.

ვოლსკის შეფასებით, არსებობს საზოგადოების და გარკვეული პოლიტიკოსების მოსაზრება ცილისწამებაზე პასუხისმგებლობის გამკაცრებასთან დაკავშირებით.

მისივე თქმით, არსებული კანონი საკმარისი რესურსია იმისთვის, რომ ცილისწამებისგან თავი დაიცვა.

"არანაირ კანონზე საუბარი არ არის. მოსაზრება გამოითქვა ცილისწამების თაობაზე ისეთ კანონის შემოღებაზე როგორიც ევროპულ ქვეყნებშია - მაგალითად საფრანგეთში. ვფიქრობ, რომ დღესაც შეიძლება არსებული კანონის გამოყენებით საკუთარი პოზიცია და თავი დაიცვა, თუმცა რასაკვირველია, არსებობს აზრი, რომ როცა საქმე ცილისწამებას ეხება, პასუხისმგებლობა უფრო მკაცრი იყოს.

მსგავსი თემის განხილვა არ მიმდინარეობს", - განაცხადა გია ვოლსკიმ.