საფრანგეთის ქალაქ ლა-როშელში მდებარე მარცვლეულის შენახვის სილოსებში ძლიერი ხანძარი გაჩნდა. ფრანგული მედიის ცნობით, ხანძარი სავაჭრო პორტთან ახლოს გაჩნდა, სადაც ათასობით ტონა მარცვლეული ინახება.
„ხანძარი Sica Atlantique-ს კუთვნილ ერთ-ერთ სილოსზე გაჩნდა და კიდევ 3 სილოსზე გადავიდა“, - ნათქვამია განცხადებაში.
წინასწარი ინფორმაციით, აალება სილოსის შიგნით დამონტაჟებული მარცვლეულის აწევისა და ტრანსპორტირების მექანიზმიდან მოხდა.
„შექმნილია უსაფრთხოების პერიმეტრი, ადგილზე ასამდე მეხანძრე მუშაობს, დახმარებისთვის დამატებითი სახანძრო ბრიგადებია გამოძახებული“, - აღნიშნულია განცხადებაში.
შეგახსენებთ, რომ ლა-როშელის პორტი საფრანგეთის მარცვლეულის ექსპორტის საკვანძო ადგილს წარმოადგენს, ხოლო საფრანგეთი - ევროკავშირის ქვეყნებიდან მარცვლეულის უმსხვილესი მწარმოებელია.