ბათუმში უკრაინის დამოუკიდებლობის დღესთან დაკავშირებით, ბულვარში მდებარე ტარას შევჩენკოს ბიუსტთან უკრაინის მოქალაქეები შეიკრიბნენ. ამ დღესთან დაკავშირებით, უკრაინის მოქალაქეებმა სიმბოლურად დროშები და სხვადასხვა ისტორიული თემატიკის ნივთები გამოფინეს.

მათი თქმით, დღეს უკრაინისთვის გამარჯვება სასიცოცხლოდ მნიშვნელოვანია.

„უკრაინაში ომის შემდეგ, ბათუმში მეორეჯერ აღვნიშნავთ უკრაინის დამოუკიდებლობის დღეს. ისტორიული თარიღი, უკრაინის მოქალაქეებისთვის მნიშვნელოვანია. ამ დღესთან დაკავშირებით, ბათუმში დღის განმავლობაში სხვადასხვა ღონისძიება გაიმართება. მასში უკრაინელებთან ერთად ადგილობრივებიც მიიღებენ მონაწილეობას. ძალიან ბედნიერი ვართ, რომ ბათუმში უკრაინელები კომფორტულად გრძნობენ თავს, თუმცა პრობლემები ძალიან ბევრია, რომელიც მოსაგვარებელია. სამწუხაროდ უკრაინელი მოქალაქეებისთვის ყველაფერს ვერ ვაკეთებთ, წელიწადნახევრის განმავლობაში ბევრმა მოახერხა დასაქმება, ასევე ბევრი უმწეოა და რესურსი არ არის, რომ ბინადრობა მიიღონ”, განაცხადეს შეკრებილებმა.