ბრიტანეთის თავდაცვის სამინისტრო - ვლადიმერ პუტინი დონის როსტოვში მდებარე სამხედრო შტაბში იმყოფებოდა, რომელიც მანამდე „ვაგნერელებმა“ ივნისის ამბოხების დროს დაიკავეს

რუსეთის პრეზიდენტი ვლადიმერ პუტინი დონის როსტოვში მდებარე სამხედრო შტაბში იმყოფებოდა, რომელიც მანამდე „ვაგნერელებმა“ დაიკავეს ივნისის ამბოხების დროს. ამის შესახებ „უნიანი“ ბრიტანეთის თავდაცვის სამინისტროზე დაყრდნობით წერს.

ბრიტანეთის თავდაცვის სამინისტროს Twitter-ის ცნობით, პუტინი შტაბს 19 აგვისტოს, „ვაგნერის“ ხელმძღვანელის, ევგენი პრიგოჟინის გარდაცვალებამდე ცოტა ხნით ადრე, თავისი ძალაუფლების დემონსტრირებისთვის ეწვია. აღნიშნულია, რომ სამხრეთის სამხედრო ოლქის შტაბი დონის როსტოვში მდებარეობს ფრონტის ხაზიდან 160 კმ-ში. იქ სამხედროები არიან განლაგებული, რომლებიც ომს აწარმოებენ უკრაინის წინააღმდეგ.

დაზვერვის თანახმად, რუსეთის პრეზიდენტი შეხვდა მაღალჩინოსნებს, მათ შორის გენერალ ვალერი გერასიმოვს, გენერალური შტაბის უფროსს, რომელიც აგრძელებს უკრაინაში ოპერაციის მეთაურობას.

„ვაგნერის“ ჯგუფმა მცირე დროით დაიკავა შტაბ-ბინა ივნისში. პუტინს, სავარაუდოდ, სურს აჩვენოს თავისი ძალა და წარმოადგინოს, როგორც ჩვეულ რეჟიმში მოქმედი უმაღლესი სამხედრო სარდლობა", - განმარტა ბრიტანეთის თავდაცვის სამინისტრომ.

ცნობისთვის, რუსეთის ტვერის ოლქში ვაგნერის "ლიდერის", ევგენი პრიგოჟინის თვითმფრინავი ჩამოვარდა, რის შედეგადაც მასში მყოფი 10 ადამიანი - 7 მგზავრი და ეკიპაჟის 3 წევრი - დაიღუპა. „როსავიაციის“ ინფორმაციით, თვითმფრინავში ევგენი პრიგოჟინი და “ვაგნერის” თანადამფუძნებელი, დმიტრი უტკინიც იმყოფებოდნენ.