უკრაინამ 84 სამხედრო მოსამსახურის ცხედარი დაიბრუნა
უკრაინამ კიდევ 84 დაღუპული სამხედრო მოსამსახურის ცხედარი დაიბრუნა, - ინფორმაციას უკრაინული მედია უგზო-უკვლოდ დაკარგულ პირთა საკითხების კომისარზე, ოლეგ კოტენკოზე დაყრდნობით ავრცელებს.
„დღეს ჩვენ მოვახერხეთ 84 დამცველის ცხედრის ახლობლებისთვის დაბრუნება", - აცხადებს კოტენკო.
მისივე თქმით, უკრაინის დროებით ოკუპირებული ტერიტორიებიდან ცხედრების რეპატრიაცია უკრაინის სამართალდამცავი უწყებებისა და საერთაშორისო ორგანიზაციების ძალისხმევით განხორციელდა.
„დაღუპული უკრაინელი სამხედროების ცხედრების დაბრუნების პროცესი გრძელდება. ეს ხდება ჟენევის კონვენციის ნორმების შესაბამისად", - აცხადებს კოტენკო.
