30 აგვისტოს ღამით და დილით უკრაინის საჰაერო თავდაცვამ კიევის საჰაერო სივრცეში 20-ზე მეტი სამიზნე გაანადგურა, - ამის შესახებ კიევის სამხედრო ადმინისტრაციის ხელმძღვანელი, სერგეი პოპკო იუწყება.

"ღამის საჰაერო თავდასხმა. კიევს გაზაფხულის შემდეგ ასეთი ძლიერი თავდასხმა არ განუცდია. მტერმა განახორციელა მასიური, კომბინირებული შეტევა დრონებისა და რაკეტების გამოყენებით", - აცხადებს პოპკო.

მისი თქმით, რუსებმა თავდაპირველად უპილოტო საფრენი აპარატები (წინასწარი მონაცემებით, Shahed-ის დრონები) გამოიყენეს, შემდეგ კი Ту-95мс ტიპის სტრატეგიული თვითმფრინავიდან რაკეტები გაუშვეს. "საჰაერო თავდაცვის ძალებითა და საშუალებებით მტრის 20-ზე მეტი სამიზნე განადგურდა", - აცხადებს სერგეი პოპკო.

შეგახსენებთ, ამ დროისთვის არსებული ინფორმაციით, კიევზე თავდასხმის შედეგად დაიღუპა ორი და დაშავდა ერთი ადამიანი.