ნიდერლანდებმა და რუმინეთმა F-16 ტიპის თვითმფრინავების პილოტების სწავლებასა და ამ თვითმფრინავების შესაბამისი მომსახურებისთვის ბაზის შექმნის შესახებ დოკუმენტს მოაწერეს ხელი, რაც უკრაინის ჰაერსაწინააღმდეგო თავდაცვის გაძლიერებაში ამ ქვეყნების წვლილი იქნება. აღნიშნული განცხადება ნიდერლანდების სამხედრო უწყების ხელმძღვანელმა, კაისა ოლონგრენმა გააკეთა.

„ჩვენთვის ძალიან მნიშვნელოვანია უკრაინისთვის ჩვენი ერთობის და მხარდაჭერის დემონსტრირება. ნიდერლანდებმა და რუმინეთმა ხელი მოაწერეს დოკუმენტს F-16 ტიპის თვითმფრინავების პილოტების სწავლებასა და ამ თვითმფრინავების შესაბამისი მომსახურებისთვის სასწავლო ცენტრის შექმნის შესახებ, რომელიც რუმინეთის ტერიტორიაზე განლაგდება. ეს ორი ევროპული ქვეყნის მხრიდან კონკრეტული ნაბიჯია უკრაინის ჰაერსაწინააღმდეგო თავდაცვის გაძლიერებისთვის და რასაკვირველია, ყველა ევროპული ქვეყნის მხრიდანაც, რომლებიც F-16-ის კოალიციის მონაწილეები არიან“, - განაცხადა ოლონგრენმა.