პარტია „საქართველოსთვის“ ითხოვს, გაიყოს გარემოს დაცვისა და სოფლის მეურნეობის სამინისტრო. აღნიშნულის შესახებ პარტიის დეპუტატმა, შალვა კერესელიძემ პარლამენტის პლენარულ სხდომაზე სიტყვით გამოსვლისას განაცხადა.

მისივე განმარტებით, აღნიშნული ორი უწყების ერთობლივად მართვა პრობლემებს ქმნის და როგორც გარემოს დაცვის, ისე სოფლის მეურნეობის დარგების განვითარების შეფერხებას იწვევს.

„გაერთიანებული ორი უწყების ერთდროულად მართვა უკიდურესად დიდ გამოწვევას წარმოადგენს. იწვევს მართვის პრობლემებს და აფერხებს როგორც გარემოს დაცვის, ასევე სოფლის მეურნეობის დარგების განვითარებას. გლობალურმა დათბობამ და მისგან გამოწვეულმა შედეგებმა, ამ საკითხების აქტუალობა მნიშვნელოვნად გაზარდა. ყოველივე ზემოაღნიშნულიდან გამომდინარე, კიდევ უფრო მკაცრი გარემოს დაცვითი პოლიტიკის შემუშავების, მისი ჯეროვნად აღსრულების, ეფექტიანად მართვის და მაღალი დონის სახელმწიფოებრივი მხარდაჭერის მიზნით, შემოვდივართ ინიციატივით, გაიყოს გარემოს დაცვისა და სოფლის მეურნეობის სამინისტრო, რომელიც თავისი არსით გულისხმობს გარემოს დაცვითი მიმართულების გამოყოფას სოფლის მეურნეობის უწყებიდან.

გარემოს დაცვისა და ბუნებრივი რესურსების სამინისტრო ჩამოყალიბდეს ცალკე დამოუკიდებელ სამინისტროდ, სადაც გაერთიანებული იქნება ამ საქმიანობით და ფუნქციებით აღჭურვილი ყველა შესაბამისი სამსახური, მათ შორის, სამეცნიერო დაწესებულებები. უნდა ითქვას ისიც, რომ ამ ორი სამინისტროს გაერთიანება თავის დროზე შეცდომა იყო იმიტომ, რომ მათი გაერთიანებით არანაირი ხარჯების ოპტიმიზაციას ადგილი არ ჰქონია. პირიქით, მისი ეფექტიანად მართვა გართულდა“,- განაცხადა შალვა კერესელიძემ.