მსოფლიოში 250 მილიონზე მეტი ადამიანი მწვავე სასურსათო დაუცველობის წინაშე დგას, უკრაინის პორტებზე მიზანმიმართული თავდასხმით კრემლი ართმევს მათ საკვებს, რომელიც ძალიან სჭირდებათ, - ამის შესახებ ევროპული საბჭოს პრეზიდენტმა, შარლ მიშელმა განაცხადა.
"სამარცხვინოა, რომ რუსეთი შავი ზღვის მარცვლეულის ინიციატივის შეწყვეტის შემდეგ ბლოკავს და უტევს უკრაინის საზღვაო პორტებს. ეს უნდა შეწყდეს", - აღნიშნა მიშელმა. მისი თქმით, მარცვლეულით დატვირთულ გემებს შავი ზღვის გავლით უსაფრთხო გადაადგილების საშუალება უნდა ჰქონდეთ.
ევროპული საბჭოს პრეზიდენტმა კრემლის შეთავაზებას, აფრიკაში 1 მილიონი ტონა მარცვლეულის მიწოდების შესახებ "აბსოლუტურად ცინიკური" უწოდა.
ამასთან, მისი თქმით, ევროკავშირი აგრძელებს ალტერნატიული საექსპორტო მარშრუტების უზრუნველყოფას და ამ დრომდე, ამ მარშუტების საშუალებით, 41 მილიონ ტონა მარცვლეულზე მეტის მიწოდებაა განხორციელებული.