ოზურგეთის მუნიციპალიტეტის მერის ავთანდილ თალაკვაძის განცხადებით, სტიქიისას დაკარგულ ერთ მოქალაქეს სოფელ სილაურში ეძებენ.

როგორც მან „ინტერპრესნიუსს“ განუცხადა, უხვი ნალექის შედეგად მეწყერსაშიში ზონებიდან მოქალაქეები უსაფრთხო ადგილას გადაიყვანეს.

„უხვი ნალექისგან მეწყრული პროცესებია განვითარებული და სოფლებში უბნებია მოწყვეტილი. მუშაობს ტექნიკა, რომ ყველგან გზა გავიდეს. ჯამში, რამდენიმე სოფელშია მსგავსი მდგომარეობა. გარდა ამისა, უხვი ნალექის შედეგად მცირე ხიდებზე წყალია გადმოსული. სოფელ ჯუმათში ერთი ბავშვის ცხედარი იპოვეს და სოფელ სილაურში ერთ ადამიანზე მიმდინარეობს სამძებრო სამუშაოები. თითქმის, ყველა სოფელში იყო უხვი ნალექი, რის გამოც, სხვადასხვა ტიპის დაზიანებებია. ყველგან გასულები არიან რწმუნებულები და მუშაობს ცხელი ხაზი. აბსოლუტურად ყელა ოჯახში მიდიან. მეწყრული პროცესები რამდენიმე სოფელში განვითარდა. სადაც საფრთხე იყო, მოქალაქეები უსაფრთხო ადგილას არიან გადაყვანილები, ასეთი რამდენიმე ოჯახია“, - განაცხადა ავთანდილ თალაკვაძემ.