უახლოეს მომავალში აშშ-ს მთავრობა უკრაინისთვის ATACMS-ის ტიპის რაკეტების გადაცემის შესახებ გადაწყვეტილებას მიიღებს და ეს ამ ქვეყნისთვის დახმარების მომდევნო პაკეტში შევა.

ინფორმაციას აშშ-ს მთავრობის მაღალჩინოსნებზე დაყრდნობით, ამერიკული მედია ავრცელებს.

„აშშ-ს ხელისუფლება გადაწყვეტილების მიღებასთან ახლოს არის, მაგრამ ოფიციალურ გამოცხადებამდე გეგმა შესაძლოა დაკორექტირდეს. გადაწყვეტილება უკვე მაგიდაზე დევს და, სავარაუდოდ, უკრაინისთვის მორიგი დახმარების პაკეტში შევა, მაგრამ რაკეტების უშუალო გადაცემას, შესაძლოა, რამდენიმე თვე დასჭირდეს“, - ნათქვამია გავრცელებულ ინფორმაციაში.

შეგახსენებთ, რომ უკრაინა რაკეტების გადაცემას დიდი ხანია ითხოვს, რადგან ეს რუსული არმიის ზურგში დარტყმების განხორციელების საშუალებას მისცემს. ამჟამად უკრაინის შეიარაღებული ძალების ამ მოთხოვნას ნაწილობრივ ბრიტანულ-ფრანგული Storm Shadow/SCALP-ის ტიპის რაკეტები აკმაყოფილებს.