რუმინეთმა, ქვეყნის ტერიტორიაზე დრონების ჩამოვარდნასთან დაკავშირებით, რუსეთის დიპლომატიური მისიის ხელმძღვანელი დაიბარა და რუმინული მხარის პროტესტი გადასცა.

მედიის ინფორმაციით, სახელმწიფო მდივანმა სტრატეგიულ საკითხებში, იულიან ფოტამ რუმინეთის საჰაერო სივრცის დარღვევასთან დაკავშირებით პროტესტი გამოხატა მას შემდეგ, რაც ქვეყნის ტერიტორიაზე, უკრაინის საზღვართან ახლოს, აღმოაჩინეს იმ დრონების ფრაგმენტები, რომლებიც რუსებმა უკრაინის დუნაის პორტებზე თავდასხმებისთვის გამოიყენეს.

გავრცელებული ინფორმაციით, ბუქარესტში რუსეთის ფედერაციის საქმეთა დროებითი რწმუნებული 9 სექტემბერს გამოიძახეს. იულიან ფოტამ მას გადასცა რუმინული მხარის მოთხოვნა, შეწყვიტონ თავდასხმები უკრაინელ მშვიდობიან მოსახლეობაზე და ინფრასტრუქტურაზე, რაც, მათ შორის საფრთხეს უქმნის რუმინეთის ადგილობრივ მოსახლეობას.