თბილისის სახელმწიფო უნივერსიტეტის რექტორმა, აკადემიკოსმა ჯაბა სამუშიამ საქართველოს ისტორიის, ეროვნული და კულტურული ფასეულობების საკითხებზე ინფორმაციის გავრცელების მიზნით სხვადასხვა მუნიციპალიტეტში საჯარო ლექციების ციკლი დაიწყო.

ამის შესახებ ინფორმაციას თსუ ავრცელებს.

მათივე ცნობით, პირველი საჯარო ლექცია გარდაბნის მუნიციპალიტეტში გაიმართა, სადაც რექტორი „თამარ მეფის ეპოქის საქართველოს“ შესახებ მოხსენებით წარსდგა.

„შეხვედრებს, რომელიც სამღვდელოებასთან და საზოგადოების ფართო ფენების წარმომადგენლებთან იმართება, ქართველი მეცნიერები და სახელოვნებო სფეროს წარმომადგენლები წარმართავენ.

საჯარო შეხვედრები ღვთისმშობლისადმი საქართველოს წილხვედრილობისა და კათოლიკოს-პატრიარქის ილია II-ის აღსაყდრებიდან 45 და დაბადებიდან 90 წლისთავის საიუბილეო თარიღების აღსანიშნად იმართება“, - აღნიშნულია გავრცელებულ ინფორმაციაში.

შეხვედრებს ორგანიზებას უწევს ააიპ "საზოგადოება ივერიისა" და საქართველოს საპატრიარქოს მისიისა და ევანგელიზაციის განყოფილება.